Proposta de musicoterapia educativa e canto comunitario para nenos e nenas de 4 a 9 anos.
Mais Cantos Infantil adapta os principios e obxectivos do Modelo Mais Cantos ás necesidades específicas da infancia, empregando a música, o canto, o ritmo, o movemento e o xogo como ferramentas de aprendizaxe, desenvolvemento persoal e relación cos demais.
TODOS OS MARTES
17:15 A 18:30 h
Local Social Costa Xiráldez de Lourido
OS PARRULOS
Inicio: 15 de setembro de 2026
1. APRENDER A TRAVÉS DA MÚSICA
A experiencia musical permite reforzar de maneira lúdica aprendizaxes vinculadas ao desenvolvemento e ao marco educativo: números, letras, cores, formas, tamaños, distancias, secuencias, orientación espacial, linguaxe, memoria, atención e asociación conceptual. Cancións, ritmos, movementos e xogos musicais convértense así en vehículos para comprender, lembrar, relacionar e descubrir.
2. APRENDER A ESTAR COS DEMAIS
A través de dinámicas musicais estruturadas trabállanse quendas, espera, escoita, roles, regras compartidas, autorregulación, cooperación, responsabilidade e traballo en equipo. O xogo cooperativo substitúe progresivamente a lóxica de «gañar ou perder» pola experiencia de conseguir algo xuntos.
3. DESCUBRIR QUEN SON DENTRO DO GRUPO
Preténdese construír un espazo seguro, participativo e preventivo no que cada neno ou nena poida explorar as súas capacidades, expresar a súa personalidade, descubrir intereses e talentos e experimentar que a diferenza individual non compite co colectivo: enriquéceo.
4. APRENDER MÚSICA FACENDO MÚSICA
Canto, voz, ritmo, percusión corporal, movemento, instrumentos e escoita permiten descubrir progresivamente pulso, ritmo, melodía, intensidade, altura, timbre, estrutura, silencio, coordinación e expresión musical.
5. UN IMAXINARIO PARA CANTAR E XOGAR
O conto musical, as cantigas infantís, xogos de roda, cantigas de maio, Nadal, Entroido e outros repertorios vinculados ao ciclo anual permiten construír sesións conectadas coa tradición, o territorio e o ritual contemporáneo. Xunto a elas aparece o gran imaxinario universal da infancia: animais · natureza · corpo · onomatopeas · personaxes · fantasía · estacións · emocións · xogo simbólico.