Dentro do universo do Modelo Mais Cantos e en alianza coa UNED Sénior nace Bailoterapia · Baile Galego · A Muiñeira Vai con Todo, unha proposta de movemento, saúde e comunidade que utiliza a aprendizaxe e a práctica do baile tradicional galego para traballar obxectivos físicos, cognitivos, emocionais, sociais e identitarios.
VÉN BAILAR!
O corpo tamén ten memoria
Bailar é moito máis que aprender uns pasos.
É mover o corpo, activar a mente, escoitar, lembrar, coordinarse, orientarse no espazo e relacionarse cos demais.
Pero cando o que bailamos é unha muiñeira, unha xota ou unha pandeirada, cando nos integramos nunha roda, facemos filas, facemos un paseo, marcamos un picado, acontece ademais algo extraordinario: movémonos dentro dunha cultura que recoñecemos como propia e compartímola cos demais.
Dentro do universo do Modelo Mais Cantos, entendemos o baile tradicional galego como unha poderosa ferramenta para promover saúde, benestar, participación e comunidade.
Desta mirada nace Bailoterapia · Baile Galego · A Muiñeira Vai con Todo, unha actividade desenvolvida en alianza coa UNED Sénior que combina aprendizaxe, práctica do baile galego e dinámicas de movemento adaptadas ás características do grupo.
Traballamos desde o corpo, pero tamén desde a memoria, a emoción e o vínculo: mobilidade, equilibrio, coordinación, atención, memoria, autoestima, benestar emocional, relación social, sentido de pertenza e identidade cultural.
Non buscamos bailar mellor para subir a un escenario. Bailamos para estar activos. Bailamos para aprender. Bailamos para restaurar e activar novos circuitos neuronais que facilitan a prevención cognitiva. Bailamos para lembrar. Bailamos para desfrutar. Bailamos para compartir.
Porque o patrimonio tamén pode coidarnos.
CORPO · RITMO · MEMORIA · IDENTIDADE · COMUNIDADE
