Comeza a actividade de musicoterapia segundo o Modelo Mais Cantos na Casa da Cultura de Pontesampaio dentro do programa +Xuntas da Excma. Deputación Provincial de Pontevedra
A actividade propón experimentar os beneficios da música desde unha perspectiva activa, participativa e comunitaria.
Nesta primeira sesión traballáronse respiración, ritmo, memoria, coordinación, percusión, canto, movemento, escoita e expresión emocional, combinando instrumentos, dinámicas corporais e repertorio popular vinculado ao territorio.
Un primeiro encontro para romper o xeo, crear vínculo e descubrir na práctica como a música pode converterse nunha ferramenta de benestar, aprendizaxe e comunidade.
A boa acollida da primeira sesión quedou reflectida tamén nas valoracións das participantes. Estrella definiuna como «fantástica, moi amena, moi participativa», destacando que «participamos todas, xuntámonos todas, levantámonos e iso que somos persoas maiores». Pola súa banda, Ainhoa, tras o exercicio final de escoita e simbolización, describiu a experiencia como «unha corrente de sensacións», unha paisaxe sonora «moi emocionante e moi diferente a todo o que tivera experimentado».
Un primeiro encontro para cantar, moverse, sentir, descubrir e, sobre todo, facer comunidade a través da música.
Se queres formar parte desta actividade, que terá lugar todos os luns deste trimestre, podes contactar a través do teléfono 647647404. Só ten un coste único de 7 € en concepto de seguro de responsabilidade civil.
Comments